Ushtria izraelite ka dërguar më shumë se 100 snajperë në kufi me Gazën para demonstratës masive të planifikuar nga palestinezët.

Organizatorët kanë thënë se presin mijëra njerëz në Gazë, përfshirë familje të tëra që do t’u përgjigjen thirrjes së tyre për t’u mbledhur në pesë vende në afërsi të kufirit që nga e premtja në një protestë gjashtë javore për të drejtën e kthimit të refugjatëve palestinezë në atë që është tani Izraeli.

Duke përmendur shqetësimet e sigurisë, ushtria izraelite zbaton një zonë “e ndaluar” për palestinezët në tokën në Gaza, ngjitur me gardhin kufitar të Izraelit, transmeton portali arbresh.info.

Gjeneral-lejtnant Gadi Eizenkot, shefi i shtabit ushtarak, i tha të përditshmes Yedioth Ahronoth se ushtria nuk do të lejonte “infiltrimin masiv” ose të toleronte dëmtimin e barrierës gjatë protestave.

“Ne kemi vendosur më shumë se 100 snajperë që u thirrën nga të gjitha njësitë ushtarake, kryesisht nga forcat speciale”, tha Eizenkot në intervistë. “Nëse jetët janë në rrezik, ka leje për të hapur zjarr”.

Ushtarët izraelitë përballen me protesta të shpeshta të dhunshme palestineze përgjatë kufirit me Gazën dhe kanë përdorur gaz lotsjellës, plumba gome dhe municione të gjalla kundër demonstruesve të cilët ushtria tha se hodhën gurë ose bomba me benzinë.

Organizatorët thanë se protesta është mbështetur nga disa fraksione palestineze, përfshirë lëvizjen mbizotëruese të Hamasit të Gazës, e cila është e dedikuar për shkatërrimin e Izraelit./Arbresh.info/